Da “Ricòrd” di Angelo Bertolini

UL TESTAMEENT

In mezz a un prà, minga luntaan,
gh’è ‘na pianta, un vecc castaan:
la gà cent’ann e anca da pù
che par brascial ga vor in dù.

‘Na pianta valta cume ‘na cà,
‘na meraviglia da rimirà:
un gigant, ma propri gross,
che sudiziuun al mett adoss.

E in estaa, cunt la calura
la so umbra la cascia frescura
tant che la geent ca la pàsa da là
lì la sa ferma a tirà ul fià.

La g’ha scolpii su la curtécia
tanti cor, ligà da ‘na frécia;
l’ha supurtàa saett e tempest
l’ha vist tanti gueer e gent furést.

Adess, però, grazie al prugess,
i preputeent ca gh’è adess
han da fa i palazi, e propri lì,
e ‘sta pora pianta la da sparì.

L’è ‘na disgrazia ca mett ul maguun
ca la fa tremà ‘sto gross piantuun:
ma siccome al po’ fa propri nieent
in sees e du vott l’ha fai testameent.

“Làsi i me fiuur a tucc i mort,
par ricordai e par daghi cunfort;
lasi i me frasch ai fulàa dul vent,
par fai vulà in ciel cuntent;

lasi ul me trunch, i ramm e i bachett
par ul camiin da scaldà i puarett,
e i me castegn ai scuiatulitt
che a rampegà ma fann i galitt;

lasi a la tèra i me radiis
parché m’hinn stai sempar amiis
e la memoria la lasi a l’umbrìa,
a chi g’avrà de mi nostalgia.

Un dispiasé ma resta, però!
A l’è un gropp cal pasa no:
ga davi ripar a tanti usèi,
petiruss, pàsar, merli, fringuèi,

gazz. cucù e cincialelegar
turd, turturei e scurbatt négar:
l’era un piasé sentii a cantà
e mo par forza han da cambià cà.

Adiu frasch, adiu usèi,
par tanti ann semm stai fredèi,
fursi da mi ga restarà la memoria
e la murala da questa storia.

Ul prugress al porta sventura
se al siguta a asasinà la natura
e se sa cuur sempar inscì
ul nostra muund al po murì.

Sa veed già adess che la so vita
a l’è cunsciaa cume un strasc da mulita,
e se, senza rimedi, sa va avanti a ruinà
cusé ca sa lasa a chi vegnarà?”